Mamlaka ya Elimu Tanzania (TEA) inajivunia ufanisi mkubwa katika utekelezaji wa miradi ya uboreshaji wa mazingira ya ujifunzaji na ufundishaji nchini. Jitihada hizi zimechangia kwa kiasi kikubwa kuinua ubora wa elimu na kuongeza fursa kwa wanafunzi na walimu kufundisha na kujifunza katika mazingira rafiki.
Miradi hiyo inatekelezwa kupitia Mfuko wa Elimu wa Taifa, ambao unahusika na kutafuta rasilimali fedha na vifaa muhimu ili kufanikisha malengo ya kuboresha mazingira ya kujifunzia na kufundishia. Kupitia mfuko huu, TEA imefanikiwa kushirikiana na wadau mbalimbali wa maendeleo katika sekta ya elimu.
Ushirikiano huu umekuwa nguzo muhimu katika kuhakikisha upatikanaji wa elimu bora kwa usawa katika maeneo yote ya Tanzania. Kwa pamoja, juhudi hizi zimeleta mabadiliko chanya kwa shule nyingi, hasa zile zilizokuwa na uhitaji mkubwa wa miundombinu na vifaa vya kujifunzia.
TEA inazidi kuwakaribisha wadau wote wa maendeleo ya sekta ya elimu kuendelea kuchangia kupitia Mfuko wa Elimu wa Taifa, kama njia ya kuunga mkono juhudi za Serikali katika kuboresha mazingira ya elimu kwa watoto wa Kitanzania.
