Idara ya Usalama wa Rais nchini Marekani (Secret Service) imemuua kwa risasi mwanamume mmoja aliyekuwa na silaha baada ya kujaribu kuingia katika eneo la makazi ya Rais Donald Trump huko Mar-a-Lago, Florida.
Tukio hilo lilitokea Jumapili asubuhi, wakati Rais Trump akiwa jijini Washington DC. Mshukiwa, aliyetambuliwa kwa jina la Austin T. Martin kutoka North Carolina, alikuwa amebeba bunduki na kopo la mafuta (gasoline) alipokabiliana na maafisa wa usalama.
Mkuu wa Polisi wa Kaunti ya Palm Beach, Ric Bradshaw, ameuambia mkutano wa waandishi wa habari kuwa mshukiwa alikaidi amri ya kuweka chini silaha zake.
“Aliweka chini kopo la gesi, lakini akainua bunduki yake katika hali ya kutaka kufyatua risasi. Hapo ndipo maafisa walipofungua moto na kumuua,” alisema Bradshaw.
Mshukiwa Austin Martin ameripotiwa kutokuwa na historia yoyote ya uhalifu huko Moore County, North Carolina, ambako familia yake ilikuwa imetoa taarifa ya kupotea kwake mapema asubuhi hiyo ya Jumapili kabla ya tukio kutokea Florida.
Tukio hili linakuja wakati kukiwa na wasiwasi mkubwa wa usalama kufuatia jaribio la mauaji dhidi ya Trump mwezi Julai 2024 huko Butler, Pennsylvania, ambapo alipigwa risasi ya sikio. Kwa sasa, ulinzi huko Mar-a-Lago umeimarishwa maradufu ukiwa na kuta mbili za ulinzi (polisi wa jimbo kwa nje na Secret Service kwa ndani).
