Waziri wa Nchi, Ofisi ya Waziri Mkuu, Kazi, Ajira na Mahusiano, Mheshimiwa Deus Clement Sangu, ametoa shukrani za dhati kwa Serikali ya Awamu ya Sita kwa utaratibu wake wa kishujaa wa kulipa deni la kihistoria la shilingi trilioni 4 nukta 46 lililokuwa linaikabili mifuko ya hifadhi ya jamii nchini.
Akizungumza jijini Arusha wakati wa uzinduzi wa Sera ya Taifa ya Kinga ya Jamii ya Mwaka 2023, Waziri Sangu amebainisha kuwa hadi sasa Serikali imefanikiwa kulipa asilimia 95 ya deni hilo ambalo lilirithiwa kutoka kipindi cha kabla ya mwaka 1999, hatua ambayo imesaidia kuimarisha ukwasi na ufanisi wa mifuko hiyo katika kuwahudumia wanachama.
Mheshimiwa Sangu ameeleza kuwa hatua hiyo ni sehemu ya safari ndefu ya maboresho ya Sekta ya Kinga ya Jamii yaliyoanza mwaka 2018 kwa lengo la kutekeleza Ibara ya 11 ya Katiba ya Jamhuri ya Muungano wa Tanzania, inayoiagiza mamlaka kuweka taratibu za kusaidia wananchi wakati wa uzee, maradhi na ulemavu.
Waziri amesisitiza kuwa kulipwa kwa madeni hayo kumeongeza kasi ya ulipaji wa mafao kwa wakati na kuleta utulivu wa kiuchumi kwa wastaafu, huku kukiakisi dhamira ya dhati ya Rais Dkt. Samia Suluhu Hassan katika kuwajali wananchi wake na kulinda haki zao za msingi.
Aidha, Waziri amebainisha kuwa uzinduzi wa sera mpya ya mwaka 2023 unahitimisha jitihada za muda mrefu za kuunganisha mifumo ya kinga ya jamii ya uchangiaji na ile isiyo ya uchangiaji, jambo ambalo litawezesha usimamizi madhubuti na jumuishi wa sekta hiyo.
Mhe. Sangu ametumia fursa hiyo kuwashukuru wadau wa kimataifa wakiwemo Shirika la Kuhudumia Watoto Duniani (UNICEF) na Shirika la Kazi Duniani (ILO) kwa mchango wao mkubwa wa kitaalamu uliofanikisha kupatikana kwa dira hiyo mpya ambayo sasa inaitoa Tanzania katika mfumo wa zamani wa kuhudumia walioajiriwa pekee na kuelekea katika hifadhi jumuishi kwa Watanzania wote.
