Vikosi vya Ukraine vimemkamata mwanajeshi wa Korea Kaskazini aliyejeruhiwa ambaye alitumwa kusaidia vita vya Urusi, shirika la kijasusi la Korea Kusini limethibitisha Ijumaa.
Mwanajeshi huyo anaaminika kuwa mfungwa wa kwanza wa kivita wa Korea Kaskazini kukamatwa nchini Ukraine tangu Desemba, wakati Pyongyang ilipoanza kupeleka vikosi vyake kuunga mkono juhudi za kijeshi za Urusi.
Uthibitisho huu unakuja baada ya picha inayodaiwa kumuonesha askari aliyejeruhiwa kusambazwa kwenye mtandao wa Telegram.
Kulingana na ripoti za Kyiv na Seoul, Korea Kaskazini imepeleka zaidi ya wanajeshi 10,000 kuisaidia Urusi. Hata hivyo, Moscow na Pyongyang hazijatoa tamko rasmi kuthibitisha au kukanusha madai haya. Rais wa Ukraine, Volodymyr Zelenskyy, alisema Jumatatu kuwa zaidi ya wanajeshi 3,000 wa Korea Kaskazini wamekufa au kujeruhiwa wakati wa mapigano katika eneo la Kursk.
Zelenskyy alionya kuwa ushirikiano unaoongezeka kati ya Moscow na Pyongyang siyo tu unachochea mgogoro nchini Ukraine, bali pia unaongeza hatari ya kutokuwa na uthabiti katika eneo la Peninsula ya Korea.
Ushirikiano wa kijeshi kati ya Urusi na Korea Kaskazini unazua hofu miongoni mwa mataifa ya Magharibi na washirika wao. Uhusiano huu unatajwa kuwa wa “hatari” kwa amani ya kikanda na kimataifa, hasa katika kipindi hiki cha mvutano wa kijiografia kati ya mataifa makubwa.
Ukraine imekuwa ikisisitiza kwamba msaada wowote wa kijeshi kwa Urusi kutoka kwa mataifa mengine unapaswa kukabiliwa na hatua kali za kiuchumi na kidiplomasia.
