Viongozi wakuu wa upinzani nchini Kenya wametoa tamko kali la kulaani kile walichokiita ni matumizi ya nguvu kupita kiasi yanayofanywa na Serikali kupitia jeshi la polisi na makundi ya vijana yanayolipwa ili kuvuruga mikutano ya kisiasa ya upinzani.
Akizungumza katika ibada ya kanisa la PCEA Utawala jijini Nairobi mwishoni mwa juma, aliyekuwa Waziri wa Mambo ya Ndani, Fred Matiang’i, amehoji sababu za kuwepo kwa wahuni nje ya Uwanja wa Ndege wa Kimataifa wa Kisumu siku ya Jumamosi, akidai kuwa walipangwa ili kumshambulia Seneta wa Nairobi, Edwin Sifuna, na timu yake.
Seneta Sifuna, ambaye alikuwa akiongoza mkutano mkoani Magharibi (Kakamega), amedai kuwa walilazimika kubadilisha uelekeo wa ndege yao baada ya kubaini kuwa wahuni walikuwa wakiwasubiri Kisumu. Amesema kuna uwezekano mkubwa kuwa ratiba yao ya usafiri ilivujishwa kutoka ndani ya Wizara ya Mambo ya Ndani.
“Sikuwahi kufikiria kuwa mngeweka wahuni katika uwanja wa ndege wa kimataifa kuwasubiri Wabunge. Kamanda wa polisi wa eneo hawezi kusema hawajui watu hao ni nani,” alisisitiza Matiang’i.
Harakati hizi zimeungwa mkono na viongozi mbalimbali akiwemo Eugene Wamalwa (DAP-K), Martha Karua (PLP), Kalonzo Musyoka (Wiper), na Rigathi Gachagua (DCP), ambao kwa pamoja wamemtaka Rais Ruto kukomesha hali ya uvunjifu wa sheria na ukiukwaji wa katiba.
Kwa upande wake, Kamanda wa Polisi wa Ukanda wa Magharibi, Isaak Mahoud, amekanusha madai ya kuzuia mikutano hiyo kwa makusudi, akidai kuwa ofisi yake haikupewa taarifa rasmi ya maandishi kuhusu mkutano wa Kakamega, bali walipata taarifa hizo kupitia mitandao ya kijamii.
