Usitishaji wa mapigano kati ya Israel na Hamas umewapa Wapalestina nafasi ya kurejea kwenye maeneo yao, lakini wanakutana na magofu na kifusi badala ya nyumba.
Katika siku ya tatu ya kusitisha mapigano, wakazi wa Gaza wameshuhudia uharibifu mkubwa uliosababishwa na miezi 15 ya vita.
Ripoti ya Umoja wa Mataifa inaonyesha kuwa kuondoa tani milioni 50 za kifusi kutoka Gaza kunaweza kuchukua miaka 21 na kugharimu dola bilioni 1.2. Aidha, kifusi kingine kinahofiwa kuwa na asbestosi (chembechembe za madini yanayoweza kusababisha ugonjwa kwenye mapafu), hali inayoongeza hatari ya kiafya kwa wakazi.
Huduma za kibinadamu zinaendelea kushinikiza msaada wa haraka ili kuhakikisha familia zinapata makazi. Ripoti ya Shirika la Maendeleo la Umoja wa Mataifa inabainisha kuwa maendeleo Gaza yamerudishwa nyuma kwa miongo saba kutokana na vita hivi.
Kwa Walaa El-Err na Abla, kurejea katika magofu ya nyumba zao kumewakumbusha maumivu ya kupoteza kumbukumbu zao za familia. “Hatuwezi kuita haya makazi, bali magofu yenye maumivu ya kumbukumbu,” amesema Walaa.
Wakati huo huo, juhudi za kutafuta miili ya waliofariki zinaendelea, huku wahudumu wa dharura wakiomba msaada wa vifaa vya uchimbaji. Atef Jundiya, mkazi wa Gaza City, amesema: “Hatuwezi hata kupata makaburi ya wapendwa wetu, lakini tunaendelea kutafuta.”
