Mtu mmoja ameuawa kwa kupigwa risasi eneo la Kitengela, Kaunti ya Kajiado nchini Kenya wakati wa maandamano dhidi ya serikali huku wito wa kumtaka Rais William Ruto ajiuzulu ukiongezeka.
Kilichoanza kama maandamano ya amani katika mji wa Kitengela kiligeuka kuwa ghasia baada ya maafisa wa polisi kuwarushia vitoa machozi waandamanaji na kusababisha mapigano kati ya waandamanaji na maafisa wa kupambana na ghasia ambao walijibu kwa mizinga ya maji kutawanya umati.
Hali ilipozidi kuwa mbaya, maafisa wa Kitengo cha Huduma ya Jumla (GSU) walitumwa kama msaada wa polisi ambao wakati fulani walizidiwa na waandamanaji.
Video zinazosambaa mtandaoni zilionesha waandamanaji hao wakiwa wamembeba muandamanaji huyo, aliyepigwa risasi kichwani, na kumpeleka sehemu tofauti.
Hii inaleta zaidi ya watu 51 ambao wameuawa wakati wa maandamano yanayoendelea, kulingana na Tume ya Kitaifa ya Haki za Kibinadamu ya Kenya (KNCHR) ambayo pia imefichua majeruhi 413 na watu 59 kutekwa nyara kutokana na maandamano hayo katika taarifa iliyotolewa na Mwenyekiti wake Roseline Odede.
Siku ya Jumanne asubuhi, maandamano yalizuka katika kaunti zaidi ya 23 ambazo ni Nairobi, Kisii, Nyamira, Migori, Nyeri, Makueni, Machakos, Laikipia, Homa Bay, Kilifi na Turkana.
Kaunti zingine ni Kajiado, Baringo, Kericho, Mombasa, Kisumu, Nakuru, Uasin Gishu, Kakamega, Bungoma na Trans Nzoia.
Jijini Nairobi, maafisa wa kukabiliana na ghasia waliwarushia vitoa machozi waandamanaji waliokuwa wameshikilia bendera na mabango ya Kenya. Biashara zilisalia zimefungwa katika Wilaya za Biashara za Kati (CBD) za miji mbalimbali huku maandamano yakiendelea wakati wa mchana.
“Hakuna mazungumzo, ni vitendo tu,” waandamanaji walipiga kelele huku wakimtaka rais ajiuzulu.
