Tanzania imetangazwa kuwa nchi bora zaidi ya kutembelea barani Afrika kwa mwaka 2025, kwa mujibu wa ripoti ya U.S. News. Tuzo hii ni uthibitisho wa mchango mkubwa wa sekta ya utalii katika maendeleo ya taifa, ikijumuisha juhudi za kuboresha vivutio vya utalii na miundombinu.
Kwa mujibu wa ripoti hiyo, watalii wengi huenda Tanzania kwa ajili ya safari, lakini pia wanapendekezwa kuchukua muda wa kugundua maajabu mengine ya asili ya nchi hii.
“Tanzania ina maajabu ya asili kama Ziwa Natron lenye rangi nyekundu, bonde kubwa la Ngorongoro, na misitu ya mvua ya Mahale inayokaliwa na sokwe. Kwa wale wanaotafuta msisimko wa kipekee, safari ya kupanda Mlima Kilimanjaro – mlima mrefu zaidi Afrika na mlima mkubwa zaidi duniani unaojitegemea – ni lazima kwa wageni kupitia waandaaji wa safari za ndani ya nchi.” Imeelezwa katika ripoti hiyo.
Hifadhi ya Serengeti pia imepewa nafasi ya kipekee, ikitajwa kushika nafasi ya tatu miongoni mwa maeneo bora zaidi barani Afrika. Tovuti hiyo inaeleza kuwa Serengeti ni mahali ambapo wageni wanaweza kushuhudia wanyama wakubwa kama tembo, twiga, simba, pundamilia, na nyumbu.
“Kama unapenda wazo la kukutana ana kwa ana na tembo, twiga, simba, pundamilia, na nyumbu, basi safari ya kuzunguka Hifadhi ya Serengeti ni ndoto unayopaswa kutimiza. Ingawa gharama zinaweza kuwa kubwa, safari hii hukupa nafasi ya kipekee ya kushuhudia savanna ya Afrika”, imeelezwa katika ripoti hiyo.
Imeelezwa kuwa msimu bora wa kutembelea Serengeti ni Januari au Februari (wakati wa nyumbu kujifungua) au kati ya Juni na Oktoba (msimu wa ukame na uhamaji wa wanyama). Wageni wanaweza kuchagua kukaa kwenye kambi za kifahari au maeneo ya gharama nafuu ndani ya hifadhi hiyo.
Pia, Zanzibar imepewa nafasi ya saba katika orodha hiyo, ikitajwa kuwa ni sehemu yenye utulivu na vivutio vya kipekee kama fukwe za kuvutia za Matemwe na Kiwengwa, pamoja na Mji Mkongwe (Stone Town) ambao ni urithi wa dunia wa UNESCO.
Tangu aingie madarakani, Rais Samia Suluhu Hassan amekuwa akihamasisha maendeleo ya sekta ya utalii na kuitangaza Tanzania kimataifa. Kupitia filamu ya kihistoria The Royal Tour, Rais Samia alionesha vivutio vya kipekee vya nchi, hatua ambayo imeongeza mwamko wa kimataifa kuhusu uzuri wa asili wa Tanzania.
Serikali pia imeweka mkazo mkubwa katika kuboresha miundombinu ya utalii, kama vile ujenzi wa barabara, viwanja vya ndege, na huduma za usafiri wa anga. Hatua hizi zimeifanya Tanzania kuwa mahali rafiki zaidi kwa watalii. Vilevile, jitihada za kuimarisha usalama katika maeneo ya vivutio zimechangia kuvutia idadi kubwa ya wageni.
Uhifadhi wa urithi wa asili pia umepewa kipaumbele, na hifadhi kama Serengeti na Ngorongoro zinaendelea kuhifadhiwa kwa viwango vya juu. Misitu ya Mahale na Mlima Kilimanjaro pia zinalindwa kwa ajili ya kizazi cha sasa na vijavyo, hatua inayosaidia utalii endelevu barani Afrika.
