Rais wa zamani wa Colombia Alvaro Uribe, amehukumiwa kwa kosa la kujaribu kushawishi mashahidi katika kesi ya ufisadi inayomhusisha. Hukumu hiyo ilitangazwa jana mjini Bogota baada ya uchunguzi wa muda mrefu uliofanyika kwa kipindi cha miezi sita.
Kituo cha habari cha DW kimeripoti kuwa, waendesha mashitaka wamewasilisha ushahidi unaoonesha kuwa Uribe alijihusisha na kuwahonga mashahidi waliokuwa wakimhusisha na mtandao wa wanamgambo wenye silaha waliokuwa wakihusishwa na machafuko nchini humo katika miaka ya 1990.
Uribe mwenye umri wa miaka 73 sasa anakabiliwa na uwezekano wa kuhukumiwa kifungo cha hadi miaka 12 gerezani. Hukumu halisi inatarajiwa kutolewa katika kikao kingine kitakachofanyika mahakamani.
Uribe alihudumu kama Rais kuanzia mwaka 2002 hadi 2010 na alikuwa na uhusiano wa karibu wa kisiasa na Marekani. Kipindi chake madarakani kilitawaliwa na kampeni dhidi ya makundi ya waasi na uimarishaji wa usalama wa taifa.
Hata hivyo, Uribe ni kiongozi anayezingatiwa kwa hisia mseto na raia wa Colombia, wengine wakimwita shujaa aliyeleta utulivu na wengine wakimhusisha na ukiukwaji wa haki za binadamu na kuibuka kwa makundi yenye silaha nchini humo.
Tuhuma dhidi yake zimezua mgawanyiko mkubwa wa maoni nchini Colombia, huku baadhi wakiamini kuwa kesi hiyo ni ishara ya demokrasia yenye uwajibikaji, na wengine wakiona ni njama za kisiasa dhidi ya urithi wake wa kisiasa.
Kwa sasa, jicho la kimataifa limeelekezwa kwenye mahakama ya Colombia na mchakato wa kutoa hukumu, hatua inayochukuliwa kama kipimo cha uhuru wa taasisi za haki nchini humo
