Jeshi la Israel limefanya shambulio katika hospitali kubwa zaidi kusini mwa Gaza usiku wa Jumapili, likisababisha vifo vya watu wawili, majeruhi kadhaa na moto mkubwa, Wizara ya Afya ya Palestina imesema.
Kwa mujibu wa wizara hiyo, shambulio hilo liligonga jengo la upasuaji katika Hospitali ya Nasser iliyoko katika mji wa Khan Younis, siku chache baada ya hospitali hiyo kufurika majeruhi na miili ya waliouawa kutokana na mashambulizi ya ghafla ya Israel baada ya kusitisha mkataba wa kusitisha mapigano wiki iliyopita.
Miongoni mwa waliouawa ni kijana wa miaka 16 aliyefanyiwa upasuaji siku mbili kabla ya shambulio hilo. Hamas imesema kuwa pia aliuawa Ismail Barhoum, mwanachama wa ofisi ya kisiasa ya kundi hilo, aliyekuwa akipata matibabu hospitalini hapo.
Jeshi la Israel limethibitisha shambulio hilo, likidai lililenga mpiganaji wa Hamas aliyekuwa akijificha hospitalini. Israel inailaumu Hamas kwa vifo vya raia kwa sababu inafanya operesheni zake katika maeneo yenye idadi kubwa ya watu.
Hospitali ya Nasser, kama zilivyo hospitali nyingine nyingi Gaza, imeharibiwa na mashambulizi ya Israel tangu kuanza kwa vita hivyo.
Wizara ya Afya ya Palestina imesema kuwa zaidi ya Wapalestina 50,000 wameuawa tangu kuanza kwa vita hivyo, huku watu 673 wakiuawa tangu Jumanne iliyopita, wakati Israel ilipovunja usitishaji wa mapigano kwa mashambulizi makubwa.
Jeshi la Israel limesema limewaua makumi ya wapiganaji wa Hamas tangu kusitisha makubaliano ya kusitisha mapigano, lakini halijatoa uthibitisho wa idadi hiyo.
Wakati huo huo, machafuko ya kisiasa nchini Israel yamezidi kuongezeka, huku raia wakionesha hasira dhidi ya Waziri Mkuu Benjamin Netanyahu. Serikali yake imepiga kura ya kutokuwa na imani na Mwanasheria Mkuu, ambaye wengi wanamwona kama kizuizi dhidi ya mamlaka ya serikali hiyo ya mseto.
Katika hatua nyingine, Israel imeamuru maelfu ya Wapalestina kuondoka kwenye eneo lililoharibiwa vibaya la Tel al-Sultan katika mji wa Rafah na kuelekea Muwasi, eneo lenye mahema duni.
Hamas imesema kuwa Salah Bardawil, mmoja wa viongozi wake wa ofisi ya kisiasa, ameuawa katika shambulio lililotokea Muwasi, ambapo pia mke wake alipoteza maisha. Jeshi la Israel limethibitisha kumuua Bardawil.
Wakati huo huo, hospitali za kusini mwa Gaza zimeripoti kupokea miili mingine 24 kutoka kwa mashambulizi ya usiku, ikiwa ni pamoja na wanawake na watoto kadhaa.
Dk. Munir al-Boursh, Mkurugenzi Mkuu wa Wizara ya Afya ya Palestina, amesema kuwa jumla ya watoto 15,613 wameuawa, wakiwemo 872 walio chini ya umri wa mwaka mmoja.
Serikali ya Israel imepitisha mpango wa kuanzisha makazi mapya 13 katika Ukingo wa Magharibi kwa kuhalalisha makazi yaliyokuwepo, hatua inayoonekana kama kuendeleza uvamizi wa ardhi ya Palestina.
Kwa mujibu wa kundi la uangalizi la Peace Now, jumla ya makazi ya walowezi katika Ukingo wa Magharibi sasa yamefikia 140, hatua inayopingwa vikali na jumuiya ya kimataifa.
