Jumuiya ya Wafanyabiashara wa Mkoa wa Dar es Salaam imezindua mpango maalum wa kuongeza wigo wa ukusanyaji wa kodi kwa lengo la kupunguza mzigo wa kodi kwa wafanyabiashara na kukomesha ukwepaji wa kodi. Katika mpango huo, jumuiya hiyo imeuagiza uongozi wa Tandika kuanzisha mabalozi wa mitaa watakaosimamia orodha ya maduka na kuhakikisha kila duka lina leseni ya biashara. Pia, mabalozi hao watasaidia kufanya makadirio ya biashara ili kuongeza mapato na kupunguza mzigo wa kodi kwa wafanyabiashara binafsi.
Pamoja na hilo, jumuiya hiyo imezindua mpango wa “Tunaweza”, ambao utahusisha wafanyabiashara kwa karibu na kurahisisha makadirio ya kodi kupitia Mamlaka ya Mapato Tanzania (TRA). Mpango huo unalenga kupanua wigo wa ukusanyaji wa mapato na kuondoa changamoto mbalimbali zinazohusiana na ulipaji wa kodi kwa wafanyabiashara.
Akizungumza katika mkutano wa wafanyabiashara wa Soko la Tandika, Mwenyekiti wa Wafanyabiashara Mkoa wa Dar es Salaam, Yusuph Omari Yenga, amesema mpango huo utaongeza uwazi na kusaidia wafanyabiashara kuelewa haki na wajibu wao katika kulipa kodi. Mkutano huo ulikuwa sehemu ya ziara ya kusikiliza, kutatua na kujadili changamoto zinazowakabili wafanyabiashara wa soko hilo.
Kwa upande wake, Tilson Kabuje, Meneja Msaidizi wa Huduma kwa Walipakodi wa TRA Temeke, amewahimiza wafanyabiashara kuhakikisha wanatoa risiti kwa kila mauzo ili kuiwezesha serikali kupata mapato stahiki. Naye Shabani Mbufu, Afisa Biashara wa Manispaa ya Temeke, amesisitiza umuhimu wa wafanyabiashara kushiriki kwa wingi katika vikao na mikutano ili kupata elimu kuhusu sheria mbalimbali za biashara.
Jumuiya ya Wafanyabiashara ina matumaini kuwa mpango huu utasaidia kuboresha mazingira ya biashara na kuhakikisha wafanyabiashara wanatekeleza wajibu wao wa kulipa kodi kwa haki na uwazi.
