Korea Kaskazini imefyatua kombora linalodhaniwa kuwa la masafa marefu (ICBM) kuelekea bahari katika pwani yake ya mashariki, jeshi la Korea Kusini limethibitisha. Tukio hili linatokea huku uhusiano kati ya Korea Kaskazini na Korea Kusini ukiendelea kuzorota.
Korea Kusini ilikuwa tayari imeonya Jumatano kwamba Korea Kaskazini ina mpango wa kulenga urushaji wa ICBM hiyo wakati wa uchaguzi wa urais wa Marekani, unaotarajiwa kufanyika tarehe 5 Novemba.
Kwa mara ya mwisho, Korea Kaskazini ilirusha kombora la ICBM mwezi Desemba mwaka jana, hatua ambayo inakiuka vikwazo vya muda mrefu na vya Umoja wa Mataifa.
Japan, jirani wa Korea Kaskazini, ilifuatilia urushaji wa kombora hilo Alhamisi na kutarajia kuwa lingeanguka baharini kufikia majira ya saa 08:40 za Korea.
Tukio hili pia linafuatia shutuma kutoka Korea Kusini na Marekani, wakidai kuwa Korea Kaskazini imepeleka wanajeshi wake nchini Urusi ili kusaidia katika vita vya Vladimir Putin nchini Ukraine.
Kuongezeka kwa uwepo wa wanajeshi wa Korea Kaskazini nchini Urusi kumezua hofu juu ya kuimarika kwa uhusiano kati ya Putin na kiongozi wa Korea Kaskazini, Kim Jong Un.
