Rais mteule wa Marekani, Donald Trump, ameonya kuwa ataweka ushuru wa asilimia 100 kwa bidhaa kutoka kwa mataifa ya BRICS ikiwa muungano huo utaanzisha sarafu mbadala ya dola ya Marekani. Kauli hiyo imeibua mjadala kuhusu mustakabali wa nafasi ya dola kama sarafu kuu ya biashara ya kimataifa.
“Wazo kwamba Nchi za BRICS zinajaribu kujiepusha na Dola huku sisi tukiwa tunatazama limefika MWISHO,” Trump aliandika kupitia mtandao wa kijamii siku ya Jumamosi.
Muungano wa BRICS, unaojumuisha China, Urusi, Brazil, India, na Afrika Kusini, pamoja na wanachama wapya kama Iran, Misri, Ethiopia, na Umoja wa Falme za Kiarabu, umekuwa ukifikiria kuanzisha sarafu hiyo ili kupunguza utegemezi wa dola.
China na Urusi, mataifa mawili yenye nguvu kubwa ndani ya BRICS, yanahimiza juhudi za kuanzisha sarafu mpya. Pendekezo hili limeungwa mkono na wanasiasa wa Brazil na Urusi, wakisema kuwa sarafu hiyo inaweza kudhoofisha utawala wa dola katika biashara ya kimataifa. Hata hivyo, migawanyiko ya ndani ya BRICS imekuwa kikwazo katika utekelezaji wa wazo hilo.
Trump, ambaye alifanya kampeni akiahidi kulinda maslahi ya Marekani kwa kuweka ushuru wa hali ya juu kwa washindani wa kibiashara, ametilia mkazo kuwa hatakubali hatua yoyote inayodhoofisha nguvu ya dola.
“Tutalinda uchumi wa Marekani kwa gharama yoyote. Ushindani usio wa haki hautavumiliwa,” Trump aliongeza kwenye taarifa nyingine.
Trump anatarajiwa kuapishwa rasmi kama Rais wa Marekani tarehe 20 Januari mwaka ujao. Kauli zake dhidi ya BRICS zinaashiria kuwa ana mpango wa kuendeleza sera kali za kibiashara, kama alivyoonesha wakati wa kampeni zake.
Ingawa vitisho vya ushuru bado ni pendekezo, hatua hiyo inaweza kuwa na athari kubwa kwa biashara kati ya Marekani na mataifa ya BRICS, huku wachambuzi wa kiuchumi wakihofia kuibuka kwa vita vya kibiashara vya kiwango cha juu.
