Mwanasiasa na mwanaharakati mashuhuri, Dkt. Wilbrod Peter Slaa, ameomba Mahakama ya Rufaa ya Tanzania impatie dhamana akisubiri rufaa yake ya jinai kusikilizwa. Ombi hili limewasilishwa chini ya hati ya dharura kubwa na wakili wake, Hekima Mwasipu, likieleza kuwa Dkt. Slaa amewekwa rumande kinyume cha sheria na kwamba afya yake inaendelea kuzorota akiwa gerezani.
Kwa mujibu wa Mwasipu, Dkt. Slaa anashikiliwa katika Gereza la Keko bila msingi wowote wa kisheria, licha ya kuwa kosa linalomkabili linastahili dhamana.
“Mteja wangu amenyimwa haki yake ya msingi kwa kuwekwa mahabusu bila sababu za kisheria kwa kosa ambalo kimsingi ni la kudhaminika,” amesema Mwasipu katika maombi rasmi kwa Mahakama ya Rufaa.
Wakili huyo ameeleza zaidi kuwa afya ya Dkt. Slaa ni mbaya na kwamba kuendelea kwake kubaki gerezani kunahatarisha maisha yake.
“Mgonjwa anapaswa kupata matibabu sahihi, na kuzuiliwa kwake gerezani bila uhalali wowote wa kisheria ni sawa na kuhatarisha maisha yake bila sababu,” ameandika katika ombi hilo.
Katika maombi yake, Mwasipu amesisitiza kuwa Mahakama ya Rufaa inapaswa kushughulikia suala hili kwa haraka kutokana na athari zisizoweza kurekebishwa endapo mteja wake ataendelea kuzuiliwa.
“Kufungwa kwa Dkt. Slaa katika Gereza la Keko ni kitendo kinachosababisha madhara yasiyorekebishika. Kwa misingi hiyo, tunaiomba Mahakama itoe uamuzi wa haraka juu ya maombi haya ya dhamana,” amehitimisha.
