Kituo cha Uwekezaji Tanzania (TIC) kimefanya ziara tarehe 13 Januari 2025 katika kampuni ya Airplane Africa Limited (AAL) yenye makao yake mjini Morogoro, Tanzania.
Kampuni hiyo kutoka Jamhuri ya Czech imewekeza katika sekta ya anga kwa kuanzisha uzalishaji wa ndege zilizounganishwa kwa mkono, hatua inayoweka msingi wa kuimarisha sekta ya anga nchini.
AAL inajihusisha na uunganishaji wa ndege za ultralight, microlight, na light sport (UL/ML/LS Airplanes), huku ikilenga kuhamishia laini yake ya uzalishaji kutoka Jamhuri ya Czech hadi Tanzania. Kwa sasa, kampuni inakusanya mifano miwili ya ndege- Skyleader 600 na 500, na ina mpango wa kupanua uzalishaji wake ili kujumuisha aina nyingine za ndege katika siku zijazo, kwa mujibu wa David Grolig, Mkurugenzi Mtendaji wa AAL.
Mkurugenzi Mtendaji wa TIC, Gilead Teri, amesifu uwekezaji huo, akieleza kuwa ni hatua ya kipekee kwa Tanzania. “Hakuna ishara kubwa ya maendeleo ya kiuchumi kuliko uwezo wa taifa kujenga na kutengeneza ndege,” amesema Teri, akisisitiza umuhimu wa uwekezaji huu kwa uchumi wa Tanzania na ukuaji wa sekta ya anga.
Wafanyakazi wa Kitanzania walioajiriwa na AAL wamesifu fursa za elimu na uzoefu zinazotokana na uwekezaji huo. Engelbert Sengati Rubani ameeleza kuwa kampuni imeajiri na kutoa mafunzo kwa wahandisi wa Kitanzania, hatua inayolenga kukuza utaalamu wa ndani.
Aidha, AAL imeanzisha mpango wa kubadilishana maarifa unaofadhiliwa kikamilifu na kampuni mama yake kutoka Jamhuri ya Czech, ili kuwapa Watanzania mafunzo ya hali ya juu katika teknolojia ya usafiri wa anga.
Kwa uwekezaji huu wa kipekee, Tanzania inaweka msingi wa kuwa miongoni mwa mataifa yanayojitegemea katika sekta ya anga, sambamba na kufungua fursa mpya za kiuchumi na kiufundi kwa vijana wa Kitanzania.
