Mwenyekiti wa BAVICHA Taifa, Deogratias Mahinyila, amemjibu Msemaji wa Timu za Taifa Tanzania, Haji Manara, akisema kuna haja ya kujiuliza nafasi na mipaka ya wasemaji wa michezo nchini.
Mahinyila amesema hayo Julai 31, 2026, akizungumzia kauli ya Manara ya kuwataka wanasiasa kutoizungumza vibaya Tanzania kuelekea Michuano ya AFCON 2027, inayotarajiwa kufanyika kwa ushirikiano wa Tanzania, Kenya na Uganda.
Amesema haelewi utaratibu wa kuwa na nafasi ya msemaji wa timu za taifa na kuhoji majukumu, mipaka na malengo ya nafasi hiyo katika kuendeleza michezo nchini.
Mahinyila amesema taifa limeanza kuweka msisitizo mkubwa kwa wasemaji wa timu na vilabu kuliko wachezaji na makocha, hali ambayo amesema haitoshi kujenga mafanikio ya michezo bila kuwa na sera bora za michezo.
Ametoa mfano kuwa kuwa na msemaji mzuri pekee hakufanyi timu kuwa na mafanikio endapo hakuna mipango bora ya usajili, maendeleo ya wachezaji na mifumo imara ya michezo.
Akizungumzia vilabu vya ndani, Mahinyila amesema hata kama msemaji wa klabu fulani anaweza kuwa maarufu au bora zaidi, mafanikio ya timu hayawezi kupatikana kwa sababu ya uwezo wa msemaji pekee bali yanategemea mfumo mzima wa uendeshaji wa klabu.
Kauli ya Mahinyila imekuja baada ya Haji Manara kuwataka wanasiasa nchini kutoisemea vibaya Tanzania kuhusu maandalizi ya AFCON 2027, akisema taifa linapaswa kuzungumzwa kwa mtazamo chanya na wale wasioweza kufanya hivyo wakae kimya.
