Serikali ya Sudan kupitia Wizara ya Biashara na Ugavi, imetoa amri ya kusitisha kwa muda usiojulikana uagizaji wa bidhaa zote kutoka Kenya. Hatua hii inakuja baada ya Kenya kuwakaribisha viongozi wa kikosi cha wanamgambo cha Rapid Support Forces (RSF) jijini Nairobi mwezi uliopita. Uamuzi huo umefikiwa baada ya azimio la Baraza la Mawaziri la Sudan, lililolenga kuiadhibu Kenya kwa kuwezesha shughuli za RSF na hivyo kuchochea mivutano ya kisiasa nchini Sudan. Serikali ya Sudan imesema kuwa uamuzi huo unatokana na sababu za kulinda maslahi ya taifa na usalama wa kitaifa. “Kwa mujibu wa Azimio la Baraza la Mawaziri Na. (129) la mwaka 2024, na kulingana na mamlaka yaliyotolewa kupitia Azimio Na. (104) la mwaka 2021, pamoja na mapendekezo ya kamati iliyoundwa na Baraza la Uongozi kushughulikia mahusiano na Kenya baada ya kuihudumia wanamgambo wa RSF na washirika wao… uamuzi ufuatao umetolewa: Kusitishwa kwa uagizaji wa bidhaa zote kutoka Kenya kupitia bandari zote, vituo vya mpakani, viwanja vya ndege na njia nyingine za usafirishaji, kuanzia tarehe hii hadi itakapotangazwa vinginevyo,” ilisomeka sehemu ya tamko rasmi la Sudan. Uamuzi huu unalenga kuonesha msimamo wa Sudan wa kutetea mamlaka yake na kulinda heshima ya taifa lake dhidi ya kile inachokiona kama uingiliaji wa masuala yake ya ndani na Kenya. Sudan imekuwa kwenye vita vya wenyewe kwa wenyewe tangu Aprili 2023, huku jeshi la Sudan (SAF) likipambana na wanamgambo wa RSF kwa ajili ya udhibiti wa taifa hilo. Mapigano haya yamewaua maelfu ya watu na kusababisha mamilioni kuyakimbia makazi yao. Kwa sasa, jeshi la Sudan linadhibiti maeneo ya Kaskazini na Mashariki mwa nchi, huku RSF ikidhibiti sehemu kubwa za Magharibi na Kusini. Kenya ilipowakubali viongozi wa RSF kusaini mkataba wa kuunda serikali mbadala ya Sudan, hatua hiyo iliibua athari kubwa za kidiplomasia na kusababisha Sudan kuchukua hatua ya kulipiza kisasi kwa kusitisha biashara na Kenya. Hii ni hatua ya kwanza rasmi ya Sudan kulipiza kisasi dhidi ya Kenya baada ya Wizara yake ya Mambo ya Nje kutoa tamko kali ikisema kuwa: “Kuwakaribisha viongozi wa wanamgambo wa kigaidi wa RSF na kuwaruhusu kufanya shughuli za kisiasa na propaganda, wakati bado wanatekeleza mauaji ya halaiki, unyanyasaji wa kijinsia, na mashambulizi dhidi ya kambi za wakimbizi wa ndani, ni sawa na kuunga mkono na kushiriki katika uhalifu huu wa kinyama.” Umoja wa Afrika (AU) pia ulilaani hatua ya Kenya, ukionya kuwa inaweza kusababisha mgawanyiko wa Sudan na kuzidisha mgogoro wa kisiasa na kiusalama. “Baraza halitambui serikali yoyote mbadala au taasisi yoyote isiyo rasmi ndani ya Jamhuri ya Sudan,” ilisema taarifa ya AU. Waziri wa Mambo ya Nje wa Kenya, Musalia Mudavadi, alijibu lawama hizo akisema kuwa Kenya inatekeleza jukumu lake la kidiplomasia kwa kusaidia Sudan kupata suluhisho la kudumu kwa mgogoro wake wa kisiasa. “Tunatambua kuwa hii si mara ya kwanza kwa makundi mbalimbali ya Sudan kutafuta suluhu kwa migogoro yao kupitia majukwaa ya kidiplomasia ya mataifa jirani. Kwa hakika, mnamo Januari 2024, pande husika katika mgogoro wa Sudan zilifanya mkutano katika taifa jirani kujadili njia ya mazungumzo jumuishi na kurejesha utawala wa kiraia,” alisema Mudavadi. Ameongeza kuwa Kenya haijaegemea upande wowote na jukumu lake ni kutoa jukwaa la kidiplomasia kwa pande zote kusaka mwafaka wa amani. Kwa mujibu wa Citizen Digital, kusitishwa kwa uagizaji wa bidhaa za Kenya kunaweza kuathiri biashara ya kanda, hasa kwa wafanyabiashara wa Kenya wanaotegemea soko la Sudan. Sudan imekuwa mnunuzi mkubwa wa bidhaa kutoka Kenya, ikiwa ni pamoja na mazao ya kilimo, bidhaa za viwandani, na huduma za kifedha. Hata hivyo, wachambuzi wa masuala ya kimataifa wanahisi kuwa hatua hii inaweza kuwa ya muda mfupi, kwani pande zote mbili zina uhusiano wa muda mrefu wa kiuchumi na kidiplomasia.