Shirika la Madaktari Wasio na Mipaka (MSF) limeamua kusitisha shughuli zake katika mji mkuu wa Haiti, Port-au-Prince, kufuatia mashambulizi makali dhidi ya wafanyakazi wake na madai ya mauaji ya wagonjwa wawili waliokuwa chini ya uangalizi wao. Hatua hii inakuja wakati ambapo ghasia zimeendelea kuongezeka nchini humo.
Tukio hilo lililodaiwa kutokea Novemba 11, 2024, limehusisha ambulensi ya MSF iliyokuwa ikiwapeleka vijana watatu waliojeruhiwa kwa risasi kwenda hospitali. Polisi wa Haiti walilisimamisha gari hilo la wagonjwa umbali wa takriban mita 100 kutoka hospitali ya MSF katika eneo la Drouillard, Port-au-Prince.
Baada ya kufyatua risasi hewani na kusindikiza gari hilo hadi hospitali ya umma ya Hôpital La Paix, polisi na wanachama wa kikundi cha kujilinda walilizingira gari hilo, kukata matairi yake, na kutumia mabomu ya machozi kuwatoa wafanyakazi wa MSF kwa nguvu.
Mashuhuda wanadai kwamba polisi waliwatoa wagonjwa hao watatu na kuwapeleka mbali kidogo na eneo la hospitali, ambako wawili kati yao waliuawa. Tukio hili limezua hofu kubwa, likiongeza mgogoro wa usalama kwa mashirika ya kibinadamu nchini Haiti.
Katika taarifa yake, MSF imeeleza kusikitishwa na kushutumu vikali mashambulizi dhidi ya wafanyakazi wake na wagonjwa. Shirika hilo limekuwa likitoa huduma za afya kwa waathiriwa wa migogoro na majanga nchini Haiti kwa miongo kadhaa, lakini sasa limeamua kusitisha huduma zake kwa sababu ya mazingira hatarishi.
Wakati huo huo, ripoti zinaonesha kuwa takribani watu 25 waliuawa Jumanne iliyopita katika jaribio lililoshindikana la uvamizi lililofanywa na genge kwenye kitongoji tajiri cha Port-au-Prince. Ghasia hizi zinaendelea kuashiria kuzorota kwa hali ya usalama nchini humo.
MSF imehimiza jumuiya ya kimataifa kushughulikia hali ya usalama nchini Haiti ili kuruhusu mashirika ya kibinadamu kuendelea kutoa huduma kwa watu wanaohitaji msaada wa dharura.
